*SHAB E QADAR*
● HAZAAR MAHINO'N SE BEHTAR ●
Shabe Qadr Ki Dusri Waja Fazilat Ye Hai Ke Is Raat Ki Ibadat Ka Sawaab Ek Hazaar Mahino'n Ki Ibaadat Se Behtar Hai.
Ye Nukta Qaabile Tawajjuh Hai Ke Shabe Qadr Ko Hazaar Mahino'n Se Behtar Farmaya Gaya.
Ye Nahi Bataya Gaya Ke Hazaar Mah Se Kitne Darje Zaayid Behtar Hai , Das(10)Darja , Sau(100) Darja Ya Hazaar(1000) Darja Ya Isse Bhi Zyada .
Ek Qaul Ye Bhi Hai Ke "Alfi Shahar" Se Muraad Hazaar(1000) Ka Muayyan Adad Nahi Hai.
Balke Mafhoom Ye Hai Ke Shabe Qadr Tamaam Zamano'n Se Afzal Hai Yaani Zyada Se Zyada Tum Jitni Muddat Ka Tasawur Kar Sakte Ho Shabe Qadr Usse Bhi Afzal Aur Behtar Hai.
Dusra Nukta Ye Hai Ke Ek Hazaar(1000) Mahino'n Ke Tarassi(83) Saal Aur Chaar(4) Mah Bante Hain Pas Agar Koyi Shakhs Tarassi(83) Saal Aur Chaar(4) Mah Tak Din Raat Musalsal IkhLaas Ke Sath Allah Ta'Aala Ki Ibaadat Kare To Bhi Ek Shabe Qadr Ki Ibaadat Itni Taweel Muddat Ki Ibaadat Se Afzal -o- Behtar Hai
Jabke Is Taweel Muddat Main Koyi Shabe Qadr Na Ho.
Isi Tarah Yu Bhi Kaha Ja Sakta Hai Ke Agar Koyi Shakhs Shabe Qadr Main Ibaadat Kare To Goya Usne Tarassi(83) Saal Aur Chaar(4) Mah Allah Ta'Ala Ki Ibaadat Main Guzaar Diye
Balke Usse Behtar Ajr Milega Is Par Bas Nahi , Agar Talab Sacchi Ho To Har Saal Shabe Qadr Naseeb Ho Sakti Hai Goya Zara Se Mehnat Aur Lagan Se Ki Hazaar Mahino'n Se Zyada Ajr-o-Sawaab Haasil Kiya Ja Sakta Hain.
●NUZULE MA'LAAYIKA●
Noore Mujassam Rahmate Aalam ﷺ Ne Farmaya Jab Shabe Qadr Aati Hai To Hazrat Jibra'eel Alehissalam Farishto Ke Jhurmut Main Zameen Par Utarte Hain Aur Us Shakhs Ke Liye Dua-E- Rahmat Karte Hain ,
Jo Khada Ya Betha Allah Ta'Aala Ki Ibaadat Kar Raha Ho.
(📙Mishkaat , J-1, S-453)
Dusri Riwayat Main Ye Bhi Hai Ke Hazrat Jibra'eel Alehissalam Aur Farishte Is Shab Main Ibaadat Karne Walo Se Musafa Karte Hain
Aur Unki Dua'on Par Aameen Kehte Hain Yaha Tak Ke Subha Hojati Hai.
(📙Fazailul Auqaat , S-251)
Ulma Farmate Hain Ke Shabe Qadr Main Ibaadat Karne Walo Se Jab Hazrat Jibra'eel Alehissalam Aur Fatishte Salaam -o- Musafa Karte Hain To Uski Nishaani Ye Hoti Hai Ke Badan Ke Rongte Khade Hojate Hain , Dil Khashiyate ELaahi Se Larazne Lagta Hai Aur Uspar Riqqat Tauri Hojati Hai Aur Aankho'n Se Aansoo Jari Hojate Hain.
Imam Raazi Rahmathullahi Alaih Ne Tafsire Kabeer Main Farishto Ke Zameen Par Utarne Ki Muta'addid Wajuh Tehreer Farmayi Hain Jin Main Se Chand Sutoor Mulahiza Hon:
1 } Jab Allah Ta'Aala Ne Farmaya Tha Ke Main Zameen Main Apna Khalifa Banane Wala Hon To Farishto Ne Kaha Tha Ke Ye Makhlooq Zameen Main Fasaad Phailayegi Aur Khoon Rezi Karegi.
Allah Ta'Aala Insaan Ki Izzat -o- Azmat Wazeh Karne Ke Liye Farishto Ko Naazil Farmata Hai Ke Jaao'n Aur Dekho Jinke Mutalliq Tum Ne Ye Kaha Tha Wo Kya Kar Rahe Hain.
Dekh Lu Mere Bande Is Raat Main Bistar -o- Aaram Ko Cchod Kar Meri Khaatir Ibaadaat Main Mashgool Hain Aur Mujhe Raazi Karne Ke Liye Aansoo Bahate Dua-E- Maang Rahe Hain
Halanke Shabe Bedari Inke Liye Farz Ya Wajib Nahi Balke Sunnate Mokidah Bhi Nahi Sirf Mere Mahbube Rasool ﷺ Ki Targeeb Dene Par Ye Apni Nind -o- Aaram Qurbaan Karke Saari Raat Ke Qayaam Par Musta'id Hain. Phir Farishte Naazil Hote Hain Momin Ki Azmat Ko Salaam Karte Hain.
2 } Allah Ta'Aala Ne Momino Se Wada Farmaya Hai Ke Jannat Main Inke Paas Farishte Aayenge Aur Unhe Salaam Karege Shabe Qadr Main Farishto Ko Naazil Farmane Ki Ek Hikmat Ye Bhi Hai Ke Rab Ta'Aala Goya Ye Batana Chahta Hai
Ae Mere Bando ! Agar Tum Duniya Main Meri Ibaadat Main Mashgool Rahe To Tumhare Paas Rahmat Ke Farishte Aayenge Aur Tumhari Ziyarat Karege Wo Tumhe Salaam Karenge.
3 } Allah Ta'Aala Ne Shabe Qadr Ki Fazilat -o- Barkat Ahle Zameen Ke Liye Rakhi Jo Yaha Rab Ta'Aala Ki Ibaadat Kare , Chunanche Farishte Isi Liye Zameen Par Aate Hain Taake Wo Bhi Yaha Aakar Allah Ta'Aala Ki Ibaadat Kare Aur Shabe Qadr Ki Kaseer Ajr-o- Sawaab Ke Mustahiq Hojaye. Iski Misaal Aisi Hai Jaise Koyi Shakhs Makka Mukarrama Is Niyyat Se Jaye Ke Waha Ibaadat Ka Ajr -o- Sawaab Zyada Milta Hai Isi Tarah Farishte Shabe Qadr Main Zameen Par Utarte Hain.
No comments:
Post a Comment